Салой Отабоев 1950 йилннг 13 апрелида Қўшкўпир туманидаги Ўртаёп қишлоғида деҳқон оиласида таваллуд топган. Падарибузруквори Отабой Мадаминов 1927 йилда туғилган бўлиб, колхозда табелчи, кассир, бригада бошлиғи бўлиб ишлаган. Онаси Хожарбиби Хўжаниёзова 1928 йилда туғилган. У ҳам шу колхознинг аъзоси эди. Салойнинг болалиги ўз қишлоғида ўтган. 1957 йили қишлоқдаги 23-умумтаълим мактабининг биринчи синфига бориб, 1965 йили саккизинчи синфини тамомлайди. У пайтлари қишлоқда ўрта мактаб бўлмаганлиги сабабли Ших қишлоғидаги 26-умумтаълим мактабининг 9-10 синфларини ўша ёққа қатнаб ўқиди. Мактабда яхши ўқиган С.Отабоев 1968 йили ХДПИ нинг кимё-биология факультетига ўқишга ҳужжат топширади ва ўқишга кабул килинади. Ўқишни 1973 йилда тамомлаган йигит ўзи ўқиган 23-умумтаълим мактабига кимё-биология фани ўқитувчиси этиб тайинланади. Олийгоҳда сабоқ берган Бобохон Хакбердиев, Сўнажон Хўжаниёзова, Гавҳаржон Хожиқурбонова, Қўзибой Қурёзов ва ўша даврда бирга ишлаган ва ўқитган устозлари Маҳмуд Эрнафасов, Оллаберган Ҳофизов, Режаббой Эржонов, Раззоқберган Матёқубов, Машариф Бекчанов, Асадулла Иброхимов, Марямбиби Рўзметова, Саодатжон Назарова, Уллибиби Бобожоновалардан ўқитувчилик касбини сир-асрорларини ўрганади.
Салой Отабоев мактабда дарс бериши билан бирга қатор йиллар кўпгина синфларга раҳбарлик қилиб, ўқувчиларни катта ҳаёт йўлига йўллаган. Бугунги кунда унинг ўқитган ва синфига раҳбарлик қилган ўқувчиларидан катта кўпчилиги раҳбарлик лавозимларида Республикамиз халқ хўжалигининг турли соҳаларида ишламоқдалар. Қишлоқда биринчи бўлиб, 1984 йилда мактабни олтин медалга тамомлаган Каримберган Сумбердиев, 1992 йилда мактабни олтин медалга тамомлаган Қувончой Отабоева, кумуш медалга тамомлаган Жаҳонгир Саидовлар мактаб жамоасининг ва қишлоқни фахри эдилар.
Таълимда яхши натижаларга эришгани учун Салой Отабоев 1982 йили халқ таълими аълочиси кўкрак нишони билан тақдирланди. Унинг фидойи ўқитувчи эканлигини яхши англаган туман халқ таълими раҳбарияти 1984 йили 23-умуммтаълим мактабига директор этиб тайинлашади. Шу билан Салой Отабоевнинг раҳбарлик фаолияти бошланади. Ўша даврларда қишлоқда 2 та умумтаълим мактаби фаолият кўрсатарди. Битта мактаб қишлоқнинг у бошида биттаси бу бошида. Аҳоли сони йил йилдан ошмоқда. Ҳар бир оилада 10 нафарга яқин болалар дунёга келаётган даврлар. Асосий муаммо мактабда синф хоналарини етишмаслиги бўлиб қолди. Муаммони мактаб раҳбарияти ўша даврдаги колхоз бошқаруви раиси Маркс Тожиев олдига қўйишди. Раис колхоз меҳмонхонасини ва клуби хоналарини мактаб ихтиёрига берди. Бу билан муаммо тўла ечилмади.1987 йилга келиб биринчи синфларнинг сони ҳатто 5 тагача етди.1988 йилда колхоз раиси Комилжон Дурдиев ташаббуси ва рахбарлигида қишлоқда 41-мактабнинг ҳашар йўли билан қурилиши бошланди. Шу йили Салой Отабоев раҳбарлигидаги мактабда ўқувчилар сони 1150 нафарга, синфлар сони эса 44 тага етди.1989 йилга келиб 41-мактабнинг ишга тушиши билан бу мактабда контингент анча пасайди. Мактабда синф хоналари етишмовчилиги қанчалик муаммо бўлмасин бу дарс сифатига асло таъсир қилмаслиги кераклигини мактаб раҳбарияти яхши тушунарди. Шу сабаб ҳам бошқарувни аъло даражада олиб бориш, таълимдан сифат ва самарадорликка эришиш учун қўлдан келган барча имкониятларни кўришди.
1989 йилда директор Салой Отабоев “Ўқитувчи-89” Тошкент шаҳрида ўқитувчилар конференциясида иштирок этди. 1990 йилнинг баҳорида Фарғона шаҳрида ўтказилган ўқитувчи ва мактаб раҳбарларининг 15-педагогик ўқишларида мактаб раҳбарлари шўъбасида ўз маърузаси билан иштирок қилиб қайтди.
41-умумтаълим мактаби ишга тушган билан ҳам йил йилдан аҳоли сонининг ортиб бориши натижасида 23-умумтаълим мактабида ўқувчилар сони янада кўпайди. Янги ўқув йилидан мактабда 38 та синф, 1032 нафар ўқувчи шаклланди. Ўқитувчилар сони 100 нафарга етди. Бу эса қишлоққа яна бир мактаб зарурлигидан далолат бериб турарди. 1989 йилнинг кузида колхоз раиси Комилжон Дурдиев ташаббуси ва рахбарлигида 46-умумтаълим мактабига ҳам асос солинди. Бу мактаб Ленин номли колхоз маблағи ҳисобидан давлат лойиҳаси асосида қуриб битказилди. Мактаб 1992 йил 1 апрелдан тўла ишга туширилди. Мактабга Қабул Машарипов раҳбарликка тайинланди. 23-умумтаълим мактабидаги ўқувчилар икки мактабга бўлинди.1992 йилда 23-умумтаълим мактабида ўқувчиларнинг умумий сони 1090 нафар бўлиб 38 та синфда ўқитилмоқда эди. Ўқитувчилар сони қарийб 110 нафарга етган эди. Мактаб бўлингандан кейин эса 23-умумтаълим мактабида ўқувчилар сони 490 нафар, синфлар сони 23 тага тушди. Ана шундан кейингина орадан шунча йиллар ўтиб мактаб бир маромда ишлай бошлади. Ўша даврларда Қўшкўпир туманининг узоқ ҳудудида “Зарбдор” совхози ташкил этилиб, у ердаги 50-умумтаълим мактабни ташкил этиш ишларига ташаббускор раҳбар Салой Отабоевни 1998 йил август ойидан директор этиб тайинлашади. У ерда бир оз ишлаганидан кейин Салой акани яна ишини ўзгартиришади. Уни энди Ўртаёп қишлоғининг Уйғур қисмидаги 24-умумтаълим мактабига 2002 йил февраль ойидан директор қилиб тайинлашди. 24-умумтаълим мактаби ҳам таъмирталаб бир аҳволда эди. Янги директор мактабни капитал таъмирлатиш чораларини излади. Шу 2002 йилнинг март ойида вилоят хокими Ислом Бобожоновга қилинган мурожаат беиз қолмади. Апрель ойидан мактабни таъмирлаш ишлари бошлаб юборилди. Иситиш системаси таъмирланди. Барча синф хоналаридаги стол, стул, доскалар алмаштирилди. Мактаб 2004-2009 йилларга мўлжалланган «Мактаб таълимини ривожлантириш умуммиллий дастури»га тушиб, 2009 йилда яна янгидан капитал таъмирланди. Салой ака Отабоевни 23-мактаб жамоаси талаби билан 2009 йил июль ойида шу мактабга директор қилиб тайинлашади. У яна мактаб қуриш учун ҳаракатни бошлади. 23-умумтаълим мактаби янгидан замонавий қилиб қурилди. Салой ака 2016 йилда мактабни фойдаланишга топширилиш ишларига бош-қош бўлиб, астойдил меҳнат қилди. Яхшидан боғ қолади, дейди доно халқимиз. Буни албатта, қаҳрамонимиз Салой ака Отабоев мисолида кўриб чиқдик. Бугун бу мактабда ўртаёпликларнинг ўғил-қизлари яйраб-яшнаб таълим-тарбия олишмоқда.
Салой Отабоев 2017 йилда 33 йиллик раҳбарлик ва 44 йиллик педагогик иш стажи билан нафақага чиқди. Салой ака нафақат мактабда, маҳалласида ҳам фаол инсонлар сирасидан.Маҳалланинг наинки иши бўлса, у бажонидил бош қўшади.Фарзандлари ҳам ота изидан бориб ўқитувчиликни танлашган.Унинг оиласини ўқитувчилар сулоласи дейиш тўғри бўлади. Салой ака турмуш ўртоғи Дармонжон Машарипова билан етти нафар фарзандни тарбиялаб вояга етказишди. Баҳромбек тадбиркор, Илҳомбек ҳарбийлик касбини танлаган бўлса, Икромбек, Дилдора, Норбек, Дилрабо ва Дилнозалар ўқитувчилик касбини улуғлаб, ишлаб келишаётган олий маълумотли, олий ва биринчи тоифали ўқитувчилардир. Шунингдек, келинлари Феруза тадбиркор бўлса, Марҳабо, Нилуфар, Садоқатлар олий маълумотли ва олий тоифали ўқитувчилардир. Салой ака Отабоев ижодкор инсон. Нафақага чиққан бўлсада доим қўлида қалами.Элдошларига қишлоғининг тарихи ҳақидаги китобни туҳфа этиш ниятида. Яқинда умра ҳаж зиёратини адо этиб қайтган қаҳрамонимиз элнинг тўй ва маъракаларида камарбаста. Бугун у яратган боғ гуллаб, яшнамоқда.У шунга хурсанд.