Қўшкўпир тумани Туризм ва спорт бўлими ҳамда туман давлат солиқ инспекцияси ҳамкорлигида Ўзбекистон Республикаси Президентининг “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги фармони ижросини таъминлаш мақсадида “4-сектор раҳбари кубоги” учун “Мен ҳам чемпион бўламан!” шиори остида қизлар жамоалари ўртасида баскетбол бўйича мусобақа уюштирилди.
Қизиқарли кечган мазкур мусобақада “Ҳумо” жамоаси кубок соҳиби бўлди. “Лочин” жамоаси иккинчи ўринни эгаллади. “Семурғ” вакилалари эса фахрли учинчи ўриндан жой олишди.
Биринчиликнинг ёпилиш маросимида қатнашган туман давлат солиқ инспекцияси бошлиғи, 4-сектор раҳбари Н.Нуруллаев сўзга чиқиб, ғолиб ва совриндор жамоаларнинг баскетболчи қизларини муваффақиятлари билан қутлади. Ўз навбатида уларни кубок, совға ва диплом билан тақдирлади.
Турсуной САТТАРОВА,
Қўшкўпир туман Туризм ва спорт бўлими бошлиғи.